Na Ernest Magashi
Waziri wa Nishati, Mhe. Deogratius Ndejembi, ameahidi kuendeleza kazi na mafanikio yote yaliyofikiwa na mtangulizi wake, Dkt. Doto Biteko, katika kuimarisha sekta ya nishati nchini.
Ametoa kauli hiyo leo Novemba 20, 2025, wakati wa hafla ya makabidhiano rasmi ya ofisi kati yake na aliyekuwa Naibu Waziri Mkuu na Waziri wa Nishati, Dkt. Doto Biteko, iliyofanyika katika ofisi za wizara hiyo zilizopo Mtumba, mkoani Dodoma.
Akizungumza katika hafla hiyo, Mhe. Ndejembi alimshukuru Dkt. Biteko kwa uongozi wake madhubuti na mchango wake mkubwa katika kuendeleza sekta ya nishati.
Amesema kuwa kipindi chote cha uongozi wa Dkt. Biteko, sekta imepiga hatua kubwa, huduma zimeboreshwa, na tija imeonekana katika utekelezaji wa miradi mbalimbali ya kimkakati.
Waziri Ndejembi ameweka wazi dhamira yake ya kuendeleza mazuri yote yaliyowekwa na mtangulizi wake, ili kuhakikisha azma ya Serikali na maono ya kufanikisha miradi ya nishati ifikapo mwaka 2030 yanafikiwa kwa ufanisi.
Kwa upande wake, Mhe. Dkt. Biteko amempongeza Waziri Ndejembi kwa kuteuliwa kuongoza wizara hiyo, akimhakikishia kuwa atampa ushirikiano kwa wakati wowote utakaohitajika ili kufanikisha maono makubwa ya Mheshimiwa Rais wa Jamhuri ya Muungano wa Tanzania, Dkt. Samia Suluhu Hassan, katika sekta ya nishati.
“Mengi nimejifunza wakati wa uongozi wangu katika Wizara ya Nishati, lakini kubwa zaidi ni sala zangu kwenu katika kutekeleza majukumu yenu ya kila siku,” amesema Dkt. Biteko.
Hafla ya makabidhiano hayo imehudhuriwa na Naibu Waziri wa Nishati, Mhe. Salome Makamba, Katibu Mkuu wa Wizara ya Nishati, Mhandisi Felchesmi Mramba, pamoja na viongozi waandamizi kutoka wizara hiyo.
Comments
Post a Comment