SIMBACHAWENE AWASHUKIA MA-DED NA MA-DC WANAOTUNISHIANA MISULI

WAKUU wa Wilaya (DC) na Wakurugenzi Watendaji (DED) wameonywa kuacha kutunishiana misuli na kuendeleza migongano badala yake washirikiane kwani wanategemeana katika kutekeleza majukumu yao.

Onyo hilo lilitolewa na Waziri wa Nchi, Ofisi ya Rais (Tamisemi), George Simbachawene mjini Dodoma jana wakati akifungua semina elekezi kwa ma-DC na ma-DED wa mikoa sita kutoka Kanda ya Ziwa.

Akizungumza kabla ya kuanza mafunzo kwa viongozi hao kutoka mikoa ya Mara, Mwanza, Kagera, Simiyu, Manyara na Geita, Simbachawene (pichani) aliwataka wachukuliane hali, hisia, tabia na wavumiliane na kushirikiana badala ya kuonesheana ubabe na kila mmoja kujiona ana madaraka.

Naibu Waziri, Ofisi ya Rais (Tamisemi), Selemani Jafo aliwataka viongozi hao kutumia vizuri dozi watakayopata hapo iwasaidie kwenda kutimiza majukumu yao vizuri na kuleta mabadiliko katika maeneo hayo.

Katibu Mkuu Ofisi ya Rais (Tamisemi), Mussa Iyombe aliwataka ma- DC na ma-Ded hao kujifunza kwa bidii katika semina hiyo kujua vizuri majukumu yao na mipaka ya kazi yao badala ya kukaa siku tano na kurudi watupu.